Hakim, Burut we Pete(Hejwiy)
Hakim
(Hejwiy)
-hey, acha toxtang, nege barisiz, bu yerde tizimliting,- chaqirdi amanliq saqlighuchi.
- hakim bilen körüshimen, xelq saylighan hakim bilen,- kétiwerdi ayal
-toxtang-toxtang, körüshimen depla körüshidighan chong dadingiz emes hakim dégen, ruxset qilsa körüshisiz,- aldini tosti amanliq saqlighuchi.
Warang-churung kötürüldi, ademler toplashti.
-erziyet idarisigha élip béringlar,- buyruq qildi ishxana mudiri.
-erziyet idarisige birer yüz qétim bardim, némini hel qildi, öyümni chéqiwétip, talada qalsam, hakim ige bolmamdiken, kona zamandiki hakim-amballarmu dewager naghra chalghan haman teq bolup dewa soraydiken, ejiba bu hakim bilen körüshmek shunche tesmu, u moshu hoyligha yaki bir pikapqila hakimmu, ésit, ésit shundaq hakimliqigha, dep qoyunglar, hakimliqidin éliwétimen undaq hakimni,- ayal sözleytti, yulqinatti.
Ayal erziyet idarisige her küni bardi. Qanchilik waqt öttikin, bir küni:
-bügün yéngi hakim kélidiken,- déyishti shu idaridikiler.
- awu hoylidiki hakimchu?
- wilayetke mu’awin waliy bolup ösüptu.
Chekchiyip qarap qaldi ayal.
Burut
(Hejwiy)
- 30 yil xizmet qilghan oqutquchida bunchilik ang bolmisa, qandaq bolghini, chüshendürünglar, burutini chüshüriwetsun dédi,- dep bashliqning yolyoruqini yetküzdi mu’awin bashliq.
- yéshim 60 ke taqap qaldi, quda-bajiliq, newrilik bolup qaldim, bu yashqa yetkende, burutumni chüshiréwitip yürsem, set emesmu?,-dédi mu’ellim.
- bashliq shundaq dégendikin chüshüriwetmemsiz, qarang, bizmu özimizni özimiz sorap chüshüriwettuqqu mana, nechche yil boldi,- déyishti birnechche xizmetdishi.
- eger yene jahilliq qilsingiz, yilliq mukapat pulingizni alimen, dep xam-xiyal qilmang,- qoshup qoydi mu’awin bashliq.
- towa, méning burutum némige taqashqan bolghiydi, silermu nimanche méning burutum bilen qalisiler, qétiqinglar uyuydighan ish bolsa, burutumni chüshürüp aware bolghiche, chiray özgertish opiratsiyisila qilduray, - zerde bilen chiqip ketti mu’ellim.
Pete
(Hejwiy)
-hoy, dawut sékrtar, bügün néme künlikini untup qalmighansile?
- yaq, untup qalamdighan, men jabdun’ghili nechche kün 
boldi.
- yene kimler kelmidi?
- réshit dawixor kelmeptu.
- bultur köterme kentning sékrtari mijezim yoq dep petige barmay néme künni körginini untup qaptu-de u dawixor.
- bashliq men jiq ichelmeymen.
- haraq ichelmigen jéninggha sékrtar bolup néme qilatting, kéchikip kelgenning jazasi, iche. Chaghanliq petilep kélip haraq ichmey ketseng manga set emesmu?
- emise, mawu kichikkine könglümni qobul qiling, héli tengshilip qalsam, ésimde yoq kétip qalmay yene.
-bashliq, ma’ariptikiler petilep keptu.
- birdem saqlap tursun, öy bikar bolghanda, 15-20 din bölünüp kirsun, bolmisa öyge patmaydu...
Apturi: Ablajan Turdi.